Ofrüsten  

van Wilhelm Engelken ut Neefolstenhusen

(Een Lesprov ut sien Book : "unnerwegens" biet Hebus-Verlag Leer - ISBN 3-935083-37-8)

Ik kann mi dor noch good up besinnen, dat wi, Nahbersjung Johann un ik, uns as Kinner en Gummischeter torechtklütert harren. Dat weer en Tack van en Boom, de in twee Ennen utleep un an de wi mit Tweernsdrahd en Weckglasgummi fast anknütt harren. Ut Papp harren wi en Schiev utsneden un Ringen dorupmaalt. Up disse Schiev leggden wi an.

Man mehr Pläseer harren wi  na uns Dünken, wenn wi up Lüntjes un Spreen schoten. Dat muß stillkens gahn, umdat mien Moder wat tegen Dinger harr, wor man Minsken of Deren mit versehren kunn.

Man de mojeste Gummiflippser, de dat na uns Dünken up de Welt geev, leeg in en Schaufenster; de weer ut Iesen un ganz mit rood Leer övertrucken. En Droom! To geern harren wi de Droom wahr worden laten un de Gummischeter köfft, man uns Knipp geev sovöl nich her. So leggen wi denn Grosken um Grosken up de hoge Kant bit wi elk en Scheter kopen kunnen.

Man de Bliedskupp hull nich lang an, wieldat ik achtern in de Kopp ja kien Ogen hebb: Mien Moder kreeg de Scheter in ‘t Vermick, un ik weer hum los. Se see domaals an mi: „Wenn du groot büst, heiraadst du wiß un kriggst Kinner. Un wenn dien Bödels denn in de Bengeljahren koomt, geev ik di dien Scheter torügg. Denn sall mi dat ins wunnern, of du dat Dingerees an de nahste Generation wiedergiffst.“-  Se hett Woord hollen: Twintig Jahr later sowat kreeg ik mien Scheter weer. Ik hebb de Droom ut Kinnertieden nich an mien Jungens wiedergeven. -  Mien Gummischeter liggt noch bi mi in ‘t Schuuv.

So hebb ik för ‘t eerste Maal Ofrüsten beleevt. Vandaag is de Welt vull van Krieg, Moord un Doodslag. Wi staht dor minnermachtig vör un könt dat nich begriepen. Ok mennig Kinnerzimmer hett en groot Waffenarsenaal, wenn ok blot as Spöltüg. Un uns Lüttjen spölt dat na, wat hör elker Dag ut de Billerkasten an Gewaltbiller tomötkummt.

Wenn dat doch in disse Tieden mehr Moders as miens geev, Moders, de seen: Allens, wat so lett, as wenn man dor Minsken of Deren mit versehren kann, ruut ut Kinnerhannen! Hier fangt Ofrüsten an.

Dieses Fenster schließen