En Köppke Tee för Luzviminda

van Wilhelm Engelken ut Neefolstenhusen

(Een Lesprov ut sien Book : "unnerwegens" biet Hebus-Verlag Leer - ISBN 3-935083-37-8)

Dör de Jahrenden vör d‘ Computer in ‘t Finanzamt harr he sien Rügg toschann seten. Weert Janssen keem vör de Tied in Ruhstand. Nu, wor hör Jungens groot weren, up egen Benen stunnen, un hör Huus ofbetahlt weer, nehmen sien Anne un he sük wat van ‘t Leven: Solang hör oll Knaken dat noch ofkunnen, wullen se de wiede Welt bekieken. In Thailand un Indonesien weren se al. De moje Landskuppen, dat warm Weer un de frünnelk Minskenslag in Asien harren hör ‘t andahn, wenn ok de Armood in welk Gewesten dor günnert hör anröhren dee. „Wat moot wi uns Heergott danken, dat uns dat so good geiht,“ seen se faker, wenn se de Biller van hör Reisen bekeken. „Egentlik muss man wat tegen de Armood in de Welt doon.“ Man seggen is nich doon.

 Wenn ok na elker Reis dat Knipp wat magerer wurr, leet Weert sük sien Elführtje elker Dag in ‘t Koffiehuus nich nehmen. Wenn he denn mit sien Klantjes alls, wat sük in ‘t Loog un in de wiede Welt ofspölde, dörkauelt harr, gung he na en halven Stünn sowat un dree Tass Koffie weer na Huus. Och ja, vör en Maant of twee is Weert up Tee umstegen un denn blot twee Köppkes. Sietdem weer dat Sodbrannen, dat hum faken pienigt harr, weg. Un elker Dag sparde he ok noch 1,50 €. Jungedi, in d‘ Maant weren dat ja ruugweg 35 €, rekende he ut.

 Dor fladderde hum eens Daags en Schrieven in ‘t Huus, wormit en Vereen Paten söchde för arm Kinner ut de hele Welt, ok ut Asien, wor he ja mennig Elend mit egen Ogen sehn harr. Fotos van Kinner mit trürig Ogen weren dor ok bi. Well en Patenskupp övernehmen dee, hulp nich blot dat een Kind, man all Kinner in dat hele Loog dor günnert kunnen tegen Sükten impft worden un in en School wat lehren. So stunn dat in dat Schrieven. 30 € sull dat in d‘ Maant kösten. Weert keem in ‘t Simeleren: He doch an de 35 €, de he elker Maant bi sien Elführtje sparen dee. He snackde de Budel mit sien Froo dör un füllde an de sülvig Avend de Andrag ut.

 Dree Week later kregen Weert un Anne en Kind: Luzviminda Orevillo in de Philippinen, fiev Jahr old. En Foto van hör leeg ok bi. Wat för en nüdelk Wicht! Dat Bild wurr glieks rahmt un uphangen. En paar Daag later gung en Breev of na de Phillippinen, na Luzviminda, mit en Foto van Weert un Anne bi ‘t Teedrinken. Wat is dat moi: Se könt in ‘t Oller noch maal en Kind upwassen sehn, na hör twee Jungens ditmaal en Wicht. Man de Freid is sachs noch grötter bi Luzviminda un hör Lü in de Philippinen.

Dieses Fenster schließen