Mitgahn laten !                van Wilfriede Aden-Bakker ut Nörden

Güstern läs ick int Kurier,uns Blattje, unner Florian, Thema Taschendiebin........

un do full mi dat wär in...............

Lang Jahren hebb ick as Plünnenrieter arbeit'. Vandaag heet dat ja woll, int Textilhandel, off noch bäter, tominnst nobelder, in't Modehuus. Dor is in good Twintig Jahr so allerhand passeert. So ok an disse een Sömmerdagg.......

Wi harn Ständers buten mit reduzeert Blusen, Westen, un wat so int Angebot weer. Ick bedeen int Laden nettekrat uns Naberschke, as dor Froo Janssen, ok n' Kundin int Laden kummt, un seggt: „Dor is een bi de Ständers buten, ick glöv de klaut!“ In de Moment kunn ick nich weg, man mien jung Kollegin, röhr sück ok nich! Se weer biet Kasse, un wull dor säker erst klor woordn. Do kweem de upgerägte Froo allwär un reep: „Nu kaamt se doch, de Mann klaut würrelk!“

Mien Kollegin har woll Angst, un meen: „Gah du doch äben hen. Ick mag dat nich, ick hebb sowat noch nich belävt!“ „Silke“, sä ick, „du sütst doch woll, dat ick noch to doon hebb. Wi sünd biet Anproov, un denn mutt Längt affstoaken worden, dat Näihstersch glieks anfangen kann!“ Mit mal flog de Glasdöör wär open, un de upgerägt Kundin stunn midden int Laden un bölk: „De hett sein Tasch vullstoppt, un will sück ut '  Stoff maken, wenn se nu nich futt  kamen!“ Och du leve Tied, nu nütz' dat ja nix mehr, een muß hen. Mien Kollegin reep wär:“Ick nich, ick nich, ick roop lever de Polizei!“ „So,“ sä ick, „denn blifft dat wär an mi hangen, wa, meenst du ich mag dat?“ Un tägen mien Naberschke noch gau: „Nähmt man all to Utwahl mit na Huus, mörgen moak wi wieder!“ Denn stapp ick gau tot Döör ut, un bi de Ständers lang. Bi de letzte Ständer, de all hast ant Lohn stunn, seech ick de Mann stahn. Pool dwas up't Kopp un n' dicken rooden Nöös keek dr' unnerdör. Sien Rad har he tägen sück stahn, mit n' grooten Tasch dran. De Kleerbügels keeken dr' baaben herut.

Wat 'n Törffkopp, doch ick, un froog hüm: „Wat sall dat, worüm klauen se Froolüü-Klamotten, un denn noch mit Bügel?“

Na ja, de Antwort kunn ick all hast ruuken. De dor vör mi stunn, dat weer n' Noko-Bruder (Norder Korn) un de har k. v. (Kanal vull), tominnst good tankt. Ick hool de Kleerbügels mit Waor ut sein Tasch, wiel ick dooch, denn is dat för uns erstmal erledigt. Denn wull ick de Sklav' loopen laaten. Man do seggt he doch glatt: „Dat is nich aal van jo, dat unnerst hebb ick bi Ceka mitgahn laaten, dat blifft in Tasch!“ Dor  full mi denn doch nix mehr to in. Man ick weer naar int Brast, un fuuter hüm an: „Lööven se , ick stah hier in't Nee Weg, to klaut Klamotten sorteeren? Dat könnt annern övernähmen!“

„Un off wi dat övernähmen“, hör ick achter mien Rügg well seggen, „dat is oll Bekanntskopp van uns. Man, besten Dank, se hemm' uns wat Arbeit affnahmen“, schmüstern de Schandarms.

Ick weer blied, as disse Dagg rum weer, un dat aal so glimpelk afflopen weer. 

Man tofrä, richtig tofrä weer ick nich! Hoppenlich, doch ick , kannst du mörgen wär dien Arbeit dohn, un nix anners as dien normal Arbeit!