Heini´s Belevnis mit sien Pingsterboom        van Hans-G. Hunger ut Holtgast

Heini wer heel upgeregt. Nu sünd dat all söben Week na Ostern, un he har sien Pingsterboom, mit de he elke Johr an´t Straat staan de, no ni kloor.

Dat nützde nix, nu muss Opa solang besabbelt wurn, bit he hüm helpen de. Un dat de sien Opa denn ok.

Een Krüz van twee Latten, vell bitchied Grönd halen, twee Kranzen binnen un de Boom wer klar. De Kroon wull Opa anner Dag van frisch Barkentacken un moi Schleifen maken.

Heini gung Pingstersaterdag to fre över de fein Boom in´t Beed. Nu kunn he anner Dag ok een bichied Geld insammeln, so as man dat hier all Tieden in´t Harlingerland makt har.

Sönndagmörgen wer he al up Tied up de Been. Opa mog de Kroon klor un nu stun he als Erst van all de Kinner bie´t Straat un tövte un tövte.

Wor bleven de Lüh blot, de vörbi kamen sulln. De kemen van Dag woll garni to Been.

Man dor, Heini freute sük, denn Tant Sini un Unkel Harm kemen mit Rad um´t Eck. Se wern nich sien Unkel un sien Tant, aver sien Olln harn hüm segt, dat man ollerde Lüh mit Unkel un Tant anreden sull.

"Een Penning för mien Kroon un Kranz" reep Heini. Unkel Harm schmüsterte un seh, "düt dat ok een bitchied mehr wesen?"

Heini kreg ganz groote Ogen, als Harm hüm een Mark in´t Hand gev. Heini bedankde sük un legde dat Markstück gliek in de Zigarrenkast, de Opa hüm to Geld sammeln geven har.

As sien Olln, de Nabers un ok sien Oma un Opa all bi hüm vörbi kamen wern, klöterte all mennig Markstück in sien Kist.

He wer nett an´t överleggen, wuföl Ies man woll doför um´t Eck bie´t Koopmann kriegen kunn, dor keem de wer een Radfohrer an.

"Een Penning för mien Kroon un Kranz" reep Heini, aver de Radfohrer de as wenn he nix hört har un fohr wieder.

Heini grummelte "anners krichst wat mit Knüppel up Pans", net as he dat van de ollerde Kinner all mol hört har.

Ov dat nu de Arger över de Radfohrer wer, oder dat völe Geld in de Zigarrenkist, sien Lengen no een lecker Ies wur so groot, dat he sük een Mark ut de Kist nehm, de he denn vell in´t Schlootskant versteken de un los gung.

Ha, wat wer dat Ies doch lecker dochte Heini, as he wer torügg kem.

Man wat wer dat, sien moi Pingsterboom leg up eenmal in Schloot un de Kroon wer hel kött reten.

De dicke Tranen kullerten Heini över de Wang as he dat sehn de un dat lecker Ies schmuck hüm up eenmal gornich mehr.

"Opa, Opa" rep he un leep in de Kök. "Kum vell, de anner Kinner hemmt mien Boom kött makt."

Opa legte dat Sönndagsblatt biet Siet un kek sük mit Heini dat Bescheeren an. He kek na all Sieden, kunn aver nümms sehn, de dat woll dahn har.

Un har sien Koh Lisa, de van´t Weid her dat lecker Grön van de Kroon net berecken kunn, nich no een poor Resten van de Schleifen um´t Hörns to hat, denn har man bit van dag nich wusst, well dat woll west wer.

Opa het de Schah vell behoven un Heini hett över Pingstern noch so mennig Mark binanner kregen mit de he up Esenser Schifscheten moi Karussell fohren kunn, nett as sien Olln un Grootolln dat fröher ok makt harn.

Aver sien Pingsterboom, de hett de beid´ Dag nich mehr ut de Ogen laten.