Omas Botter                                    van Gerd Aden ut Wittmund

Mien Oma, van Moders Kant, weer eenmalig kuplet. Of in d´Binnerennen, of in d´Skür, se keem mit all Warken klar. Ok Fohrradschlauch flicken, ´n Lock in Emmer of Pott mit ´n Metallskiev ofdichten, ´n Riester up Skoh setten: för Oma keen Problem. Bi Winterdag hett se jung Wichter ut ganz Kuntrei `t Neihn lehrt, ja - un mennig Enkelkind hett se ohn Hebammsk up d`Welt hulpen.

M a r i a, so heet se, weer ´n Instution. Veeruntachentig Johr is se old word´n ofwoll Froo Marga, een Wohrsegerin, de jeder Johr mit "Wagen Nr. 11" uo´t Esenser Skiefsketen stunn, hör tein of füftein Johr minner vörutseggt harr. Solang as se disse Johr´n noch nich achter sück harr, hett hör dat Orakel in d´Kopp seten, meen mien Moder.

Na d´erst Weltkrieg, in d´twintiger Johr´n. gung´t in völ Hüs sünnig to. Van wegen "Goldene Zwanziger". Minsken, de disse Tied noch mitmakt hebbt, könnt tügen, wu stur dat vör mennigeen weer, dör´t Johren to kamen. Well´n Kooh harr un to Winter ´n Swien slachten kunn, blev vör´t Slimmste bewöhrt. Doch Familjies mit ´n Koppel Kinner harrn´t ok denn noch drock genog, elker Dag wat up d´Disk to bringen. Bi Sömmerdag, wenn d´r wat ut Tuun holt word´n kunn, weer´t wat lichter. "Unser täglich Brot gib uns heute", dat Gebet harr Bedüden.

In Oma un Opas Huus weer tüsken Gang (Flur) un d´Döskdeel ´n Spieskammer. Melk, Botter, Brot, Handkees, Karmelk un anner Eddelwaren wurr´n dorin verwohrt. Wenn ik doran vörbikeem, weer de Versökung groot, eben gau wor bi to gahn. Man dat weer streng verbaden, vör all. Örder van Oma.

Dormit de Botter nich to dick up´t Brot smeert wurr, harr Oma ´n ganz enfach Rezept. Bevör de sülvstmakt Botter up d´ Disk keem, wurr de mit Solt tafelklor makt. Dat mut so wesen, um der rechte Smaak doran to kriegen. Aber Oma harr immer ´n Appetitzügler-Toslag inbetrucken. So sünnig as se anners ok weer, bi´t Bottersolten weer se heel reell. Smeer man de Botter up´t Stück, spacker een mitunner ´n Spütter Solt in´t Gesicht. Ik weer dor ´n mal mit bi, as Opa bi´t Abendbroteten