Dieses Fenster schließen

De Welt is Lütt, oder??

Is noch gor nich so lang her, dor vertell mi een von mien Frünnen, dat he bie de MEYER-Werft in Papenburg von sein Firma ut wat to doon har. Un dat ganze hett sück denn so todrogen, as ick jo dat nu vertellen much.

Gerd arbeit as Schlosser bie een Firma, de Stromgeneratoren utleehnen deit. Normolerwies is he dejenige, de disse Generatoren achteran weer nokieken und repareern deit. Man mutt nu ok seggen, dat diesse Firma bloss mit ganz groote Generatoren hanteeren und handeln de. Nich soo´n  Tüdelkroom woor man´n Lamp of´n Rodio an anschluten kunn. Disse Sort weer so groot as´n Kleerschapp. Nun keem dor eenes gooden Doochs een Anfrooch von de MEYER-Werft. De wullen sück woll eben een von disse „Moppels“ utleehnen. Gerd sein Chef het denn ok an´t Telefon düchtig an Schnacken wesst mit de Mann von de Werft, man dat eenzigste wat he kapeert het, dat de Apparot son un son Leistung hebben muss und dat sein Jungs sück bie de Hauptwache anner Dach mörgen melden schulln. Denn man düchtig!...Bulli tot Schuppen ut, beeten waschen (gung ja dat erste mol no MEYER!), Anhänger dorachter tüdelt und denn man mit Gobelstopler rupp up de Wübb mit dat groote Ding. Spanngurten dor umto un anner Dach mörgen schull dat denn ja losgohn.

No sowat´n gooden Stünnen fohrn keemen Gerd und sein Lehrjung nu in Papenburg an. Und dor kunnst von wieden all de groote, witte Haal von´t Werft sehen. Utschillert weert ok ganz good und nu keemen de beid mit hör Bulli und Wübb bie de Hauptwache an. Anholen vöört Schlachboom, Bulli ut, utstiegen und de Kerl achter de Schief mit dat Lock drin erst eben vertellen, wat se denn woll wullen und schullen. De Kerl mit de Mütz achtert Schief keek erstmol in so´n Liste und denn wuss he ok all Bescheed (Noom von´t Firma stunn ja ok up Gerd sein Latzbüx!) Und nu gung dat los: Fohrn se man eben hier liekut, dor achtern denn links und bi so´n grooten Gastank is denn weer een Schlagboom. Dor sitt denn ok well un de vertellt jo denn genau wor jie henn moten. Dat is ja kompleet hier secht Gerd und spring weer in sein Bulli. Achter hüm steiht all weer een mit´n grooten Lastwogen. Schlachboom hoch und los geiht dat. Överall leegen dor riesige Isenploten un Röhren, Containers stunnen dor rum und soon grooten Kran suus dor up´t Gelände rum. Jo, weer düchtich groot hier. Und dor weer ok all de nächste Schlachboom. Dor stunn nu all een vör, de har´n geelen Jack an und so´n Helm up´t Kopp. Gerd kurbel de Schief andool und reep de geele Mann mit dat Funkgerät in´t Hand no sück her. De keem ok glieks und wuss ok woll all halverans beschkeed. He bölk dor irgendwatt in sein Apparot rin und denn hull he sück dat ok glieks weer an´t Ohr. He bölk denn noch mol „Alln´s klor!“ in sein Kist und denn hett he Gerd vertellt: Dor vörn, liek ut und bi dat ganz groote Tor kannst denn links so rin fohrn, immer liek ut un denn kummt dor well mit´n blauen Helm un de besöcht di denn een mit´n Gobelstopler, de di de Krom denn afloden deit! Gerd fohrt los. Lehrjung secht all gannix mehr, denn de weer blos all an´t kieken, wu groot dat dor doch all is. So, liek ut....links dör dat groote Tor und denn liek ut! Gerd is so wiet fohrn, bit he nich mehr wieder keem und dor weer ok all de Mann mit de blaue Helm und de wuss ok all genau beschkeed! Gobelstopler keem, Spanngurten los und rünner mit dat Ding. As Gerd sein Krom erledigt har, dor muss he ja noch so´n Zettel utfüllt hebben von de Mann mit de Helm. As de denn sein Hanschen uttrecken de, dor secht Gerd: Nu sech mol, wie sünd doch hier nu bi de MEYER-Werft und ji moken doch groote Schippen hier!...ick sünn hier noch nie wesst und dor wull ick mol frogen, of ji in Moment woll an soon groote Schipp arbeiten doon un of man sück dat woll mol ankieken kunn!?...de Mann mit sein Helm kickt Gerd an...steckt sein Kugelschriewer weer in´t Tasch und secht denn: Dreih di mol üm und dor achtern, dat groote Tor, wor du dörfoohrn büst....Dat Lock hebbt wi noch nett nicht dichtschweisst. Du büst in´t vöranst Enden von´t Schipp mitten drupp!!...Gerd keek nochmol um sück to, sett sück weer in sein Bulli und is denn ganz sinnich weer von´t Schipp, döör dat groote Tor, övert Gelände, an´t Hauptwache vörbi weer no Huus hen fohrn.

Schnackt hett he up Rücktour nich mehr vööl mit sein Lehrjung!

Frank Damke

Dieses Fenster schließen