Wiehnacht vöör Kinner ?

                    van Adelheid Damke, geschr. 1995  
 

 Wiehnacht is een Fest vöör Kinner, denkt van uns so mennigeen

Kinneroogen köönt noch strahlen, dor kann man de Freud `noch sehn

Freu`n sück över Kleenigkeiten .........,  weer dat moij, wenn dat so weer 

Denn weer ok de Heiligabend maal wer so, as  sück dat höör.

Man wat schölln de Kinner maken, disse Utwahl is so groot

Van September bit Oktober, lockt dat Wiehnachtsangebot 

Jeder Mörg`n is in de Zeitung, een groot Stapel Zettels in 

Un wenn du ok noch so düll bist, kieken deihst dor doch ja rin.

Dor kann man sük nich entscheden, lever dit of lever dat

Och wat sünd dat doch vöör Qualen , Moder hett dat Söken satt

„Kannst du mi mal eben vertellen“,  seggt se an eer lütten Jann

„ wat wuurd mit de Kraam van`t letzt`Johr, dat steiht  ungebruukt up Böön“.

Schullst dor man weer mal mit spölen,    soooo....een Stapel steiht dor her

Mi dünkt, all de düre Saken, interesseern di gornich mehr.“

„ Hör mal to, mien leeve Moder“, seggt he – un wurd richtig düll

du wünscht`di doch ok nee Kleeder un dien Kleerschapp hangt  soooo vull 

Snackst`all weer van`n neej`n Halskett, hest`in`t Schaufenster een sehn

Dorbi hest du to Geburtstag van uns Papa erst een kräg`n . „

„ Un ok Papa, disse Schlingel, wünscht sück all weer`n Kamera

dorbi wuur he mit de anner, de he hett, noch gornich kloor

hett he sehn bi Unkel Peter, de hett ok ja all soo`n Kraam

man de kann dor ok mit umgahn, „  Moder  „ kannst du mi verstahn

„ Un wat is nu mit uns Oma ? , kummt se Wiehnacht ..oder nich

ik mag nich an letzt` Johr denken, an dat trurige Gesicht

as ji hör de  „Schüssel“ schunken, vör de Fernsehapparat

un du an hör seggen deest,  „  weil wi doch in Urlaub gaht ,

nu kannst`du di`t all bekieken, hest Programme noch un noch

kannst di richtig  amüseern ,.   „ Oma,  segg, du freust`di doch ? « 

«  Ik will nich wer na Mallorca, oder Oma de geiht mit

un up Spöölkraam dor verzicht  ik,  ji hebbt doch to`n  Spöölen keen Tied

un nu wünsch ik mi to Wiehnacht, een ganz grooten Kleenigkeit

dat uns Oma  Heiligabend, fein weer bi uns sitten  deiht

ik will denn mien Spöölkraam halen, baben van`t Böön, so as du seggst`

un denn spöölt wi all tosamen........    

                                glöövst`du ok , dat wuurd een Fest ???