Dütsk, "Ihnen of Sie" - dat is de Fraag"        van Gerd Aden ut Wittmund

As de Bahn noch van Saan na Nörd´n fohr, verleep tüsken Esens un Holtgast an d´Nordsiet van Schienen smal Padd. Dar weer blot för de Bedensten van d´Bahn gedocht. Annern harn dor nix verlorn. Lütk Enn´vör de Brügg övert´t Bensersieler Deep, wor´t Gleis de Nörder Straat överquert, leep dat Padd ut.

´t weer noch to Rieksbahntieden, as de Esenser Skandarm jüst an disse Knüttpunkt weer, as Jann, een Bekannen van mi, mit Rad up dat Bahnpaddje up Holtgast an fohr. Skandarm hett hüm anholln un to Red stellt. Dor weer nich an vörbitokamen. He sull Straf betalen. Jann is tegen hüm angahn un hett sück verdiffendeert, so god as he kunn.

Sien Vertellen na hett he an de Obrigkeit seggt, dat he woll wuß, dat ´n dor nich fohr´n drüff, un denn wieder: "Aber das geht Sie gar nichts an." Wu de Fall nu en´d hett, weet ik nich. Man dor geiht mit dat ok nich um.

In Huus hett Jann denn vertellt, wat he vör´n Verdreet hat harr un wat he an d´Skandarm seggt harr. Sien Froo full hüm in´t Woord un sä: "Segg noch mal wat du up hoogdütsk an hüm seggt hest." Jann: "Ik hebb to hüm seggt - das geht Sie gar nichts an." "Nä o nä," sä sien Froo, "wat büst ok doch ´n Dütskverdarver. Dat mutt heten: Das geht Ihnen nichts an." Noch nadüll sä Jann: "Dat is mi egal, ik hebb hüm jedenfalls seggt, dat hüm dor nix van angeiht."

Disse Begebenheid wurr immer wer ´n mal vertellt, nett as´t topaß keem, wenn´t um Recht un Örnung up Bahn un Straten oder ok um Spraaklehr gung. Jann wurr dor nich bi schont. Un denn geböhr dat´n mal, dat een Tohörer de annern verklart hett, dat se sük man nich wunnern sull´n, denn up recht Dütsk mut dat würelk heeten - das geht sie nichts an.

So wurr de Dütskverdarver up´d lesd unvermooden Winner. Wegen sien Froo hett hüm dat haagt. "Ja-a-a," leet he sük vernehmen, "wenn ik wat seggen do, denn stimmt dat ok." Man dor löw he woll sülvst nich all to fast an.

Jann un sien Froo sünd all lang dood. Egal wat in d´Himmel vör´n Amstsspraak gelt, up hör Disput wegen "Ihnen oder Sie" kieken se nu wiß minnachtig andal.