Mien Osternüst              een Vertellsel van Else Bontjes

Wiehnachten is man nett vörbi un wi dür´n all weer an Ostern denken. Och ja, Ostern, dor is mi doch mal wat passeert!

So ruchweg veerteihn Dag vör Ostern maak ik mien Osternüst. Bi uns för´d Kökenfenster stunnen dree Lindboomen. Achter de middelste Boom maak ik all Johr mien Osternüst. Mien Moder see alltied, dat Nüst mutt all Johr up sülvige Stee, anners find de Osterhaas de neet weer.

Erst krabb ik mi´n lüttjen Kuhl un denn söch ik mi moi grön Moos up. Mit dat Moos wuur dat Osternüst moi utstaffert. Un dormit dat ok noch moier utsach, un de Osterhaas ok moier liggen kunn, wuurn ok noch´n paar Blömkes d´r tüsken maakt. Un dormit ni jeder sofort sach, dat daar mien Osternüst weer, legg ik all Johr över dat Nüst een ollen Dackpann.

Wenn ik mörgens upstunn, weer de erste Gang na mien Osternüst. Osterhaas weer elke Mörgen daarwest. Dat weer´n Teken, dat ik leev west weer.

Un dor, eenes Dags queem mien öl Unkel up Visit. Ik sprung för Bliedskup dor de Köken. Ween mien Unkel queem, kreeg ik mestien´s ´n Groschen. Dor kunnst fröher n´heel bült för kopen.

He steg van´t Rad un stell hum an de erste Boom. Puh, dor har ik ja erst mal weer Glück hat. Man wat maakt he nu? He leep´n paar Tree wieder na de tweede Boom, fummel sück wat an´t Büx, un drei sück heel verdächtig achter´t Boom. Oha, ik seecht all. De Spütters flogen bi de Boom up, un mien Unkel strunn heel gemächlich un strull mi doch glatt up de Dackpann un denn leep dat in mien Osternüst.

Mien Gebrull har´n ji hörn sullt. Dat Osternüst weer nu ja neet mehr to bruken un wor anners dürs ik dat ja neet maken, har mien Moder seggt, anners wür Osterhaas dat Nüst neet finnen.

Ik hepp humm den up Nordsiet van uns Huus achtert Kaasboom makt. Dor queem keeneen. Dor kunn mi denn ok keeneen rinstrullen. Un komisch, ofwoll dat Nüst nu up´n annern Stee weer, hett Osterhaas hüm trotzdem funnen!