Is dat Bosseln de wohre freeske Religion?

Ut Hoogdütsk överset van Hans-G. Hunger

Teindusend Johr bevör dat Kind in Stall van Bethlehem geborn wur, glövten de Freesen an "Forsete". Forsete wer för all de wichtig Saken in´t Leven van de Freesen toständig. He sörgte för een goode Arnt, let de "Heilig Hain" för sük warken un tögelte den "Blanken Hans".

In disse Tieden wahnten de Freesen an de Nordseeküst van dat Land, wat vandag Schleswig-Holstein het bit na Holland un ok na wieder. Dat gev dor na keen Ost-, West-, Nord- un Freesland. Dat hebbt sük anner Minsken utdocht, de dat groode Freesenriek in verscheeden Länder updeelt hebbt. Over sowiet sün wi in de Geschicht van de Freesen ok na gor ni.

Dor wer nu in de oll Tieden Forsete un denn gevt dat ok no dree wichtig Steerns an´t Himmel, de in dat Leven van de Freesen van groode Belang wern. Vandag givt dat blos no twee. Se heten aver anners. De een dat is de roode Steern Mars un de anner het Jupiter. De oll Namen van disse Sterns bi de Freesen wern aver  "Gummi" un "Pockholt". Na rug weg tweehunnert Johren na Christi hebt se disse Sterns in de Modenamen "Mars" un "Jupiter" umnömt.

Aver de Freesen, de bit to söbenunsömbtig Prantzen (dat sünd van Dag rug weg fiftig Kilometer) van´t groode Water weg wahnten, glövten wieder an Forsete. Hör wur aver up de Dood verbaden de Namen "Gummi", "Pockholt" of "Kunststoff" (dat wer de darte Steern un de Steern van de Wösten. Disse Steern is aver bit van Dag wegbleven) uttospreken.

Freeske Gottsdeenst

Domit de Freesen ok wieder in hör Gloven leven kunn, hebbt se sük dat Bosseln utdacht. To allereerst hebbt se Klei- un Lehmkluten rund makt un in de Sünn drögen laten. Denn hebbt se de anstreeken. Mal rood, wat se ut´n willn Mohn makt hebbt un mal bruun, dat kregen se van Granatpuhlen hen. 

Sönndagsnamiddags gungen se denn in´t Dörp un schmeeten mit disse Kluten, an de se vandag Klööd seggt, tegeneenanner. In Würgelkkeit  wern disse Bosselkämpfe aver hör versteckde Gottsdeenst, dat sull blos nüms weeten.

Ja so is dat.

Drüm mark di dat good, bi de Freesen is Bosseln nix anners als een Freeske Gottsdeenst. Dorbi is de Bahnanwieser de Wannerprediger. Dat Bosseln is wat Heiligs, denn door is de Urgeist van dat freeske Herkamen in!

Dor scheeten se nu gegeneenanner un kibbeln sük um jeden Meter. Se renn un bölken achter jeden van de heilig Kööt an. Se ropen in hör heilig Wahn: "He löpt no" un "jo jo jo" of "gewaltig, riesig" un so wieder, un so wieder.

De Anbeeders van de Gummi-Steern hebbt sük wer an de oll Tieden torügg besunnen un schmiet nu in de olle Tradition mit een Gummi-Kloot. Un de annern, de fröhr de Pockholt-Steern anbeden hebbt, maken dat netso. Se laten de Pockholter över de Straaten rulln, dat dat man so rappelt. 

Ja un denn gifft dat ja ok no de Kunststoff-Steern-Anbeders. Disse Bosselklööd sünd gewaltig in´t kamen un van de freeske Straaten ni mehr wegtodenken. Aver wöster as de anner Bosselers sünd de Kunststoff-Steern-Anbeders van fröhr ok ni.